Maxfiylik siyosati

1.Biz kimmiz

Brandy — kiyilgan (second hand) kiyim, poyabzal, sumka va aksessuarlarni sotiş va sotib oliş uçun onlayn platforma. Kiyim brendli ham, brendsiz ham bölişi mumkin. Sotuvçilar eʼlon joylaydi, xaridorlar ularni topib, sotuvçiga Telegramʼda yozadi. Brandyʼning özi tovar sotmaydi va tölov qabul qilmaydi.

Xizmatni «DREAMLOGIC TECH» MÇJ (STIR: 311960493; keyingi örinlarda «Brandy» yoki «biz») taqdim etadi. Biz foydalanuvçilar maʼlumotlar bazasining egasi va operatorimiz.

Siyosat quyidagilarga tatbiq etiladi:

• Brandy ilovasi (iOS va Android), app.brandy.uz va brandy.uz saytlari;
• Telegramʼdagi @brandy_uz_bot boti va uning Mini Appʼi;
• @brandyuz_official Telegram kanali.

Siyosat Özbekiston Respublikasining «Şaxsga doir maʼlumotlar töğrisida»gi Qonuniga muvofiq tuzilgan. Brandyʼdan foydalaniş qoidalari alohida hujjatda: Foydalaniş şartlari.

2.Qanday maʼlumotlarni yiğamiz

Telegram orqali kirganingizda

Telegram hisobingiz orqali kirişni tasdiqlaganingizda Telegram bizga quyidagilarni beradi:

• Telegram identifikatoringiz (ID raqami);
• Telegramʼda körsatilgan ism va familiyangiz;
• username (agar bölsa);
• profil rasmingiz: undan Brandyʼdagi rasmingizni tayyorlaymiz va haftasiga bir marta Telegramʼdagi rasm bilan soliştirib yangilaymiz.

Tanlagan tilingizni ham saqlaymiz.

Apple orqali kirganingizda (iPhone)

iPhoneʼda Apple hisobingiz orqali ham kirişingiz mumkin. Bunda Apple bizga quyidagilarni beradi:

• Appleʼning Brandy uçun bergan identifikatori (u faqat Brandyʼga tegişli, boşqa ilovalar uni bilmaydi);
• ismingiz: faqat birinçi kirişda va uni ulaşişga rozi bölsangiz.

Email manzilingizni söramaymiz. Akkauntni öçirganingizda Apple bilan boğlanişni bekor qila olişimiz uçun Apple bergan maxsus kalitni (refresh token) saqlaymiz. Eʼlon joylaş uçun Telegram hisobingizni bir marta ulaysiz, çunki xaridorlar sotuvçiga Telegramʼda yozadi. Şunda yuqoridagi Telegram maʼlumotlari ham akkauntingizga qöşiladi.

Özingiz qöşadigan maʼlumotlar

• Profil (ixtiyoriy): özingiz haqingizda qisqa matn, şahar, kiyim va poyabzal ölçamlaringiz.
• Eʼlonlar: rasmlar, toifa, brend, tovar nomi, ölçam, holati, «Original / Nusxa» javobi, narxlar, tavsif va viloyat. Eʼlonning holati (faol yoki sotilgan) va sotilgan sanasi ham saqlanadi.
• Baholar: sotuvçilarga qöygan yulduzlaringiz (1 dan 5 gaça).

Brandyʼdan foydalanganingizda

• yoqtirgan, saqlagan va körgan eʼlonlaringiz;
• obuna bölgan sotuvçilaringiz;
• qaysi eʼlon böyiça sotuvçiga «Yoziş»ni bosganingiz;
• Telegramʼdagi Mini Appʼni birinçi marta reklama havolamiz orqali oçgan bölsangiz, öşa reklamaning qisqa nomi (masalan, «kosmetika1»). Undan faqat qaysi reklama yangi foydalanuvçi olib kelganini biliş uçun foydalanamiz;
• yuborgan şikoyatlaringiz (eʼlon yoki sotuvçi, sabab va izoh) va bloklagan foydalanuvçilaringiz;
• kiriş seanslari: ilova yaratadigan tasodifiy qurilma identifikatori, seans boşlangan va oxirgi marta işlatilgan vaqt. Seans kalitini serverda faqat qaytarib bölmaydigan xeş körinişida saqlaymiz.

Joylaşuv

Joylaşuvdan foydalanişga ruxsat bersangiz, ilova sizga yaqin eʼlonlarni birinçi körsatiş uçun viloyatingizni aniqlaydi:

• koordinatalar taxminan 1 km aniqlikkaça yaxlitlanib, serverga bir marta yuboriladi;
• server ulardan faqat viloyatni aniqlaydi. Koordinatalar saqlanmaydi va jurnallarga yozilmaydi;
• qurilmangizda faqat viloyat nomi saqlanadi.

Ruxsat bermasangiz, viloyat internet manzilingiz (IP) böyiça taxminan aniqlanadi; bu manzil ham saqlanmaydi. Viloyatni Sozlamalarda özingiz tanlaşingiz, ruxsatni esa istalgan vaqtda qurilma sozlamalarida öçirişingiz mumkin.

Texnik maʼlumotlar

Har bir sörovda serverimiz IP manzilni, qurilma yoki brauzer turini va sörov vaqtini köradi. Ulardan xizmatni haddan taşqari köp sörovlardan himoya qiliş va xatolarni tuzatiş uçun foydalanamiz. Server jurnallarining hajmi çeklangan, eski yozuvlar avtomatik öçib boradi.

Reklama havolamizni (brandy.uz/get/…) oçsangiz, öşa reklamaning şu kungi bosişlar soniga qurilmangiz turi (iPhone, Android yoki kompyuter) böyiça bitta qöşiladi. Bu son sizga boğlanmaydi: hisoblagiç IP manzil, qurilma identifikatori yoki cookieʼni saqlamaydi (haddan taşqari köp sörovlardan himoya uçun server manzilni xotirasida köpi bilan bir soat uşlab turadi, diskka yozmaydi). Har qanday sörov kabi bu oçiş ham yuqorida aytilgan server jurnallariga tuşadi.

Oçiq Telegram kanallaridan olingan eʼlonlar

Brandy sotuvçilar oçiq Telegram kanallarida joylagan sotuv eʼlonlarini ham körsatadi. Bunday eʼlondan uning matni, rasmlari va unda yozilgan aloqa maʼlumoti (sotuvçining usernameʼi yoki telefon raqami) olinadi va şu maʼlumot bilan Brandyʼda sotuvçi sahifasi oçiladi.

Bu sizning eʼloningiz bölsa, uni olib taşlaşni yoki öz akkauntingizga ötkazişni söraşingiz mumkin (8-bölim). Brandyʼga öşa username bilan kirsangiz, bunday eʼlonlar akkauntingizga avtomatik ötadi.

Telefon raqami

Biz telefon raqamingizni söramaymiz. Botning avvalgi versiyasi raqam söragan edi: öşanda raqam bergan bölsangiz, u akkauntingizda saqlanadi, boşqalarga körsatilmaydi va akkaunt öçirilganda öçadi.

Yordam xizmatiga yozganingizda

• @brandy_support_bot: xabaringiz (matn, rasm, ovozli xabar) Brandy xodimlarining şu bot bilan Telegramʼdagi çatiga nusxa qilib yuboriladi, javob ham şu bot orqali keladi. Xodimlar Telegram ID, ism, username, tilingizni va Brandy akkauntingiz bölsa, undagi faol eʼlonlar sonini köradi. Yozişmaning özi Telegramʼda qoladi; serverimizda faqat qaysi xabar kimniki ekanini bildiruvçi raqamlar saqlanadi.
• support@brandy.uz: xatingiz email manzilingiz va yozganlaringiz bilan birga yordam xizmatining poçta qutisiga tuşadi.

Yiğmaydigan maʼlumotlar

Biz email, tuğilgan sana, jins, uy manzili, kontaktlar röyxati, tölov kartasi maʼlumotlari va reklama identifikatorini söramaymiz. Ilovada reklama, kuzatuv (tracking) va uçinçi tomon analitika vositalari yöq.

3.Maʼlumotlardan nima uçun foydalanamiz

Bot sizga faqat akkauntingiz va eʼlonlaringizga oid xabarlarni yuboradi. Reklama xabarlarini yuborişni boşlasak, avval alohida roziligingizni söraymiz.

Eʼlonlarni tahlil qilişda sunʼiy intellektdan foydalanamiz (4-bölim). Akkauntni bloklaş kabi siz uçun muhim qarorlarni esa faqat avtomatik ravişda qabul qilmaymiz: ularni odam körib çiqadi.

4.Maʼlumotlarni kim köradi va kimga beramiz

Hamma köradi

• eʼlonlaringiz: rasmlar, tavsif, narx, ölçam, holat va viloyat;
• profilingiz: ism, username, rasm, özingiz haqingizdagi matn, şahar, reyting va eʼlonlaringiz;
• @brandyuz_official kanalidagi postlar: eʼlon rasmlaridan tuzilgan kollaj, tavsif va sotuvçi (username yoki Telegram profiliga havola).

Kanal postlarini boşqalar ulaşişi yoki saqlab qöyişi mumkin. Eʼlonni öçirsangiz, u Brandyʼdan va kanaldan öçadi, lekin boşqalar oldinroq olgan nusxalarni biz nazorat qila olmaymiz.

Sotuvçi

Eʼlon böyiça «Yoziş»ni bossangiz, sotuvçi ismingizni va Telegram profilingizga havolani olişi mumkin, şunda u sizga javob yoza oladi. Keyingi yozişmalaringiz Telegramʼda böladi, Brandy ularni körmaydi.

Şikoyat qilsangiz, sotuvçi kim şikoyat qilganini körmaydi: şikoyatni faqat Brandy moderatorlari köradi. Kimnidir bloklasangiz, u bu haqda bilmaydi.

Xizmat körsatuvçilar

Maʼlumotlarni faqat xizmat işlaşi uçun zarur hajmda quyidagilarga beramiz:

• Telegram: kiriş, bot xabarlari va kanal Telegram orqali işlaydi. Telegram maʼlumotlarga öz maxfiylik siyosati asosida işlov beradi.
• Apple: iPhoneʼda Apple orqali kirişni tanlasangiz, kirişni Apple tasdiqlaydi. Apple maʼlumotlarga öz maxfiylik siyosati asosida işlov beradi.
• netcup GmbH (Germaniya): serverlarimiz şu kompaniyada joylaşgan. U faqat texnik xizmat körsatadi va maʼlumotlardan öz maqsadlarida foydalanmaydi.
• Anthropic (AQŞ): sunʼiy intellekt xizmati. Oçiq kanallardan olingan eʼlonlarning matni va rasmlaridan brend, narx va ölçamni ajratib oliş uçun işlatiladi. Bot orqali joylangan eʼlon rasmlarida brend körinişini tekşiriş yoqilgan bölsa, öşa rasmlar ham şu xizmatda tekşiriladi. Anthropicʼga faqat eʼlon mazmuni yuboriladi, akkauntingiz maʼlumotlari emas.
• Cloudflare (AQŞ): brandy.uz domenining DNS xizmati; support@brandy.uz ga kelgan xatlarni yordam xizmatining poçta qutisiga yönaltiradi.
• Google (AQŞ): yordam xizmatining poçta qutisi (Gmail). Unga faqat support@brandy.uz ga yozgan xatlaringiz tuşadi.

Brandy jamoasi

Xodimlarimiz moderatsiya, yordam va xizmatni yuritiş uçun zarur maʼlumotlarni köradi. Boşqaruv paneliga kiriş çeklangan va himoyalangan.

Boşqa hollar

• Davlat organlari: faqat qonunda belgilangan hollarda va rasmiy sörov asosida.
• Huquqiy voris: kompaniya qayta taşkil etilsa yoki xizmat boşqa şaxsga ötsa, şu siyosat şartlari saqlangan holda.

Ilovani App Store yoki Google Play orqali yuklab olasiz. Apple va Google öz siyosatlari asosida işlaydi, biz ularga profil yoki eʼlon maʼlumotlaringizni bermaymiz.

Maʼlumotlaringizni sotmaymiz va reklama tarmoqlariga bermaymiz.

5.Çet elga uzatiş

Serverlarimiz Germaniyada joylaşgan. Vazirlar Mahkamasining 2026-yil 29-iyuldagi 415-son qarori Germaniyani şaxsga doir maʼlumotlar yetarli darajada himoya qilinadigan davlatlar röyxatiga kiritgan. Şuning uçun maʼlumotlarni u yerda saqlaş «Şaxsga doir maʼlumotlar töğrisida»gi Qonunning 15 va 27¹-moddalariga mos keladi.

Anthropic, Cloudflare va Google AQŞda joylaşgan, Telegram esa öz serverlarida turli mamlakatlarda işlaydi. Ularga faqat 4-bölimda yozilgan maʼlumotlar va faqat öşa maqsadlar uçun uzatiladi.

Özbekistonda saqlanişi majburiy bölgan maʼlumotlarni (biometrik va genetik maʼlumotlar) biz yiğmaymiz.

6.Qança vaqt saqlaymiz

7.Maʼlumotlarni qanday himoya qilamiz

• Ilova, sayt va server orasidagi barça ulanişlar şifrlangan (HTTPS).
• Kiriş Telegram yoki Apple orqali tasdiqlanadi, Brandy parol saqlamaydi.
• Kiriş kaliti ilovada qurilmaning himoyalangan xotirasida (iOS Keychain, Android Keystore), brauzerda esa sahifa skriptlari öqiy olmaydigan cookieʼda saqlanadi. Serverda faqat uning xeşi turadi.
• Akkauntdan çiqqaningizda yoki uni öçirganingizda seans darhol yopiladi.
• Maʼlumotlar va zaxira nusxalariga faqat zarur xodimlar kira oladi.
• Maʼlumotlar sizib çiqsa, qonunda belgilangan muddatlarda vakolatli davlat organiga xabar beramiz. Hodisa sizga taʼsir qilsa, sizni ham xabardor qilamiz.

8.Huquqlaringiz va akkauntni öçiriş

Sizning huquqlaringiz:

• biliş: qaysi maʼlumotlaringizga, qanday maqsad va asosda işlov berilayotgani, ular kimga berilgani, qança saqlanişi va çet elga uzatilişi haqida;
• maʼlumotlaringiz bilan tanişiş va ularning nusxasini oliş;
• tuzatiş: profil va eʼlonlarni ilovada özingiz tahrirlaysiz; ism va rasm Telegramʼdan olinadi;
• rozilikni qaytarib oliş: masalan, joylaşuv ruxsatini qurilma sozlamalarida öçiriş;
• maʼlumotlarni öçiriş yoki ularga işlov berişni töxtatişni talab qiliş;
• vakolatli davlat organiga yoki sudga şikoyat qiliş.

Qanday murojaat qiliş kerak. Bizga @brandy_support_bot yoki support@brandy.uz orqali yozing (12-bölim). Sörov sizniki ekanini tasdiqlaş uçun öşa Telegram hisobidan yozişingizni söraşimiz mumkin. Sörovingizga 10 kun içida javob beramiz; rad etsak, sababini tuşuntiramiz.

Akkauntni öçiriş. Brandy ilovasida: Sozlamalar → «Akkauntni öçiriş». Boşqa yöl — bizga yozing. Akkaunt öçirilganda:

• barça eʼlonlaringiz rasmlari bilan birga Brandyʼdan va kanaldan öçiriladi;
• yoqtiriş, saqlaş, körilgan eʼlonlar, obunalar, bloklar va sizga qöyilgan baholar öçiriladi;
• ismingiz, username, rasmingiz, profil matni, şahar, ölçamlar va telefon raqami (bölsa) öçiriladi;
• barça seanslar yopiladi;
• Apple orqali kirgan bölsangiz, Apple bilan boğlaniş bekor qilinadi;
• boşqa sotuvçilarga qöygan baholaringiz, «Yoziş» bosilgani soni va yuborgan şikoyatlaringiz sizga boğlanmagan holda qoladi.

Öçirişni qaytarib bölmaydi. Keyinroq öşa Telegram yoki Apple hisobi bilan kirsangiz, yangi böş akkaunt oçiladi. Zaxira nusxalarda maʼlumotlar 6-bölimdagi muddatgaça qolişi mumkin.

9.Yoş çegarasi

Brandy 16 yoşdan katta foydalanuvçilar uçun möljallangan. 16 yoşga tölmagan bölsangiz, Brandyʼdan foydalanmang. 16 yoşga tölmagan şaxsning maʼlumotlarini bilmasdan yiğganimiz maʼlum bölsa, ularni öçiramiz. 18 yoşga tölmagan bölsangiz, eʼlon joylaş va xarid qiliş uçun ota-onangiz yoki vasiyingizning roziligi kerak.

10.Qurilma va brauzerdagi maʼlumotlar

Ilova va sayt qurilmangizda faqat işlaşi uçun zarur narsalarni saqlaydi: kiriş seansi, til, mavzu (yoruğ yoki qoronği), viloyat, tugallanmagan eʼlon qoralamasi va lenta tezroq oçilişi uçun uning nusxasi. Reklama yoki kuzatuv cookieʼlari işlatilmaydi.

11.Siyosatdagi özgarişlar

Siyosatni yangilaşimiz mumkin. Muhim özgarişlar haqida kuçga kirişidan kamida 30 kun oldin ilova, bot yoki kanal orqali xabar beramiz. Yangi ixtiyoriy funksiya haqidagi qöşimçalar şu funksiya bilan birga kuçga kiradi. Maʼlumotlardan yangi maqsadda foydalaniş uçun sizdan yangi rozilik söraymiz. Amaldagi versiya va kuçga kirgan sana sahifa boşida körsatilgan.

12.Aloqa

«DREAMLOGIC TECH» MÇJ

• STIR: 311960493
• Yuridik manzil: Özbekiston Respublikasi, Toşkent şahri, Yunusobod tumani, «Turkiston» MFY, 6-mavze, 40-uy, 27-xonadon
• Email: support@brandy.uz
• Telegram yordam boti: @brandy_support_bot (ilovada: Sozlamalar → «Yordam»)
• Kanal: t.me/brandyuz_official

Maxfiylik böyiça savol va sörovlarga 10 kun içida javob beramiz.